जिल्ह्यात सुरू असलेल्या विविध सिंचन प्रकल्पांची माहिती यावेळी मंत्र्यांनी जाणुन घेतली व अडचणी जाणून घेऊन लवकरच या अडचणी दूर करत हे प्रकल्प पूर्णत्वास नेले जातील अशी माहिती दिली.
या नेते - अधिका-यांची बैठकीस उपस्थिती
यावेळी अमळनेर मतदार संघाचे आमदार अनिल भाईदास पाटील, विधानसभेचे माजी अध्यक्ष अरुणभाई गुजराथी, माजी मंत्री सतिश पाटील, माजी मंत्री गुलाबराव देवकर, आमदार लताताई सोनवणे, राष्ट्रवादी काँग्रेसचे जिल्हाध्यक्ष रविंद्र पाटील, माजी आमदार दिलीप वाघ यांच्यासह लोकप्रतिनिधी व पदाधिकारी उपस्थित होते. तर सिंचन विभागाचे प्रधान सचिव लोकेश चंद्रा, प्रकल्प समन्वय सचिव एन.व्ही. शिंदे, लाक्षेवि सचिव घाणेकर, सहसचिव कपोले, तापी खोरे संचालक कांबळे, मुख्य कार्यकारी अभियंता प्रशांत मोरे आदी उपस्थित होते.
सिंचनप्रश्नी सविस्तर चर्चा
यावेळी आमदार अनिल पाटील यांनी पांझरा - माळण नदी जोड प्रकल्पाविषयी माहिती दिली. सदर प्रस्ताव मंजूर करावा अशी मागणी केली व आग्रह धरला. त्यावर मंत्री जयंत पाटील यांनी संबंधित सचिवांसह तापी खोरे महामंडळाचे मुख्य कार्यकारी अभियंता प्रशांत मोरे यांना याबाबत योग्य ती कार्यवाही करण्याच्या सूचना दिल्या.गिरणा प्रकल्पाअंतर्गत जामदा डावा कालवा नूतनीकरण करून म्हसवे तलाव व भोकरबारी धरण भरण्यासाठी कालवा निधी उपलब्ध करून द्यावा, पाडळसरे धरणाच्या पुढील कामासाठी निधी कसा उपलब्ध करून देता येईल यासाठी सर्व लोकप्रतिनिधींनी आग्रह धरला. तसेच नुकत्याच झालेल्या अतिपावसाने जिल्ह्यात कापूस पिकांचे मोठे नुकसान झाले. त्या कापसाचे पंचनामे ताबडतोब झाले पाहिजे. उपमुख्यमंत्री अजित पवार यांनी मंत्रिमंडळ बैठकीत कृषीमंत्री दादा भुसे यांच्याकडे कापसाचे पंचनामे करा व त्याबाबत काय मदत करता येऊ शकते याबाबत चर्चा केली आहे. या विविध प्रश्नांवर बैठक पार पडली. त्यामुळे पांझरा माळण प्रकल्पासह, पाडळसरे धरण, जामदा डावा कालवा या प्रकल्पांना गती प्राप्त होणार आहे. विशेष म्हणजे यासाठी जिल्ह्यातील सर्व लोकप्रतिनिधी, पदाधिकारी यांच्यासमवेत झालेल्या या चर्चेला महत्व प्राप्त झाले आहे.
No comments
Post a Comment